Coas vacacións escolares á volta da esquina, son moitas as familias que buscan opcións para poder conciliar. O Campus de Verán de Xinzo de Limia volve a espertar un gran interese e prevese a participación dun cento de nenos e nenas. A iniciativa, que comezará o 3 de xullo, está promovida polo clube Escolas Deportivas coa colaboración do Concello.

As actividades realizaranse durante todo o mes de xullo, en horario de 10:00 a 13:30 horas, contando con variedade de propostas, entre as que podemos destacar o pádel, a orientación, xogos deportivos e piscina, e outras de tipo lúdico como sesións de cine, manualidades e excursións.

O campamento está dirixido a nenos e nenas de entre 4 e 12 anos, en cada unha das quendas, podendo elixir entre a primeira ou segunda de xullo, ou o mes completo. Opcionalmente, ofrécese un servizo Madruga con entrada ás 9:00 horas.

Dende a concellería de Deportes informan de que xa está aberto prazo de inscricións, que durará ata o mércores 21 xuño, podéndose presentar os formularios no pavillón de deportes, piscina climatizada ou casa de cultura.

O Campus de Verán de Xinzo de Limia é unha das propostas da programación deportiva organizada polo Concello para os próximos meses. Así, está previsto que o 16 de xuño haxa unha roda de capoeira e o 18 de xuño organizouse o Torneo de Baloncesto Vilas Internacional. Participarán máis de 30 equipos e 250 xogadores no de minibásket.

O 20 de xuño arrancará o Xinzo Fit, unha proposta na que se unen deporte e saúde e que se repite un ano máis polo éxito colleitado noutras edicións. Ofreceranse actividades dirixidas como bailoterapia, pilates ou aeróbic, gratuítas e para toda a poboación. Desenvolveranse todos os martes e xoves a partir das 20.30 horas.

Tamén no mes de xuño, do 23 ao 27, programouse o Campus de Ximansia, ademais dos Campus de Fútbol e de Baloncesto. Ademais, para favorecer a conciliación familiar, o Campamento urbano arrancará o 3 de xullo en diferentes quendas.

Esta é a programación ao completo:

16 de xuño: Roda de capoeira fin de curso.

18 de xuño: Torneo de Baloncesto Vilas Internacional.

20 de xuño: Inicio do Xinzo FIT

Do 22 ao 27 de xuño: Campus de ximnasia.

Do 26 ao 30 de xuño: Campus de fútbol.

Do 26 ao 30 de xuño: Campus de baloncesto.

1 e 2 de xullo: Torneo de Fútbol 7 Piñeira Seca.

3 de xullo: Inicio do Campamento urbano.

8 e 9 de xullo: Torneo de Fútbol 7.

Do 10 ao 30 de xullo: Torneo de Tenis Vila de Xinzo.

15 e 16 de xullo: Torneo de Fútbol Sala Festas de Santa Mariña.

Do 21 ao 23 de xullo: Torneo de Pádel Vila de Xinzo.

Do 29 de xullo ao 6 de agosto: Campus Salva Arco.

Do 31 de xullo ao 4 de agosto: Campus Real Celta de Vigo.

5 de agosto: Torneo 3x3 de Baloncesto.

Os interesados en participar nalgunha das actividades xa poden inscribirse poñéndose en contacto coa concellería de Deportes no número de teléfono 988 461 020.