Unha radiografía dos problemas de saúde dos diferentes segmentos da poboación de Xinzo será o punto de partida para mellorar a súa calidade de vida. Nesta máxima sustentase o primeiro Plan Local de Saúde do municipio, que vai tomando forma despois da toma de contacto que tivo lugar entre representantes do Concello, profesionais do centro de saúde e do centro de día e representantes dos catro centros escolares de primaria e secundaria da vila.

Os problemas psicolóxicos derivados da pandemia, a soidade dos maiores, a obesidade infantil, o consumo de bebidas azucradas, a necesidade de mellorar os desprazamentos en carril bici ou as adiccións no sentido máis amplo (medicamentos, substancias, alcol ou tabaco) foron só algúns dos problemas postos sobre a mesa nesta primeira reunión e polo tanto atallalos será tamén un dos obxectivos do primeiro Plan de Saúde de Xinzo. Todos os asistentes coincidiron en que os hábitos saudables adquírense na infancia e que aquí é onde hai que incidir.

A intención é que este grupo inicial vaia aumentando en posteriores reunións con representantes de colectivos, asociacións e organizacións con representación no territorio. Así o explicou a alcaldesa de Xinzo de Limia, Elvira Lama: “Traballadores sociais, educadores sociais, especialistas sanitarios, do ámbito deportivo, da igualdade de xénero e da sociedade civil irán achegando en cada área as carencias, os problemas e os activos necesarios para dar cunha solución que sexa posible e real”.

Esta primeira reunión serviu de base para marcar as canles de comunicación, establecer un cronograma e planificar as seguintes reunións nas que está previsto que participen diversos representantes da cidadanía. Trátase, en definitiva, de marcar unha folla de ruta sobre a que actuar, poñendo recursos humanos e materiais.

Cómpre recordar que a necesidade de elaborar un Plan Local de Saúde púxose de manifesto nas xornadas de saúde de Atención Primaria, premiadas coa primeira Beca de Medicina Rural e que se celebraron o pasado 5 de xuño en Xinzo, ademais de ser un compromiso electoral da propia alcaldesa asumido por todo o grupo de goberno no pacto firmado tras as eleccións municipais.

Entre os obxectivos do plan están a promoción de estilos de vida saudable, a detección de problemas na saúde da cidadanía ou a identificación das enfermidades predominantes entre a poboación, así como das súas causas.