Xinzo de Limia ten moito que dicir no que se refire a música tradicional. Quedou demostrado esta fin de semana coa celebración do Certame Celtibérico de Bandas, que volveu á vila 20 anos despois cun gran éxito, tanto pola gran participación e calidade dos grupos –unha trintena de todo o país e Portugal- como polas visitas rexistradas e o impulso que supuxo para o tecido económico. Por todo iso, e unha vez demostrado que Xinzo de Limia é o escenario idóneo para a súa celebración, o concello postúlase para ser sede permanente deste evento en, polo menos, algunha das fases.

Cómpre destacar que os grupos locais triunfaron nesta edición. A Banda de Gaitas de Xinzo de Limia conseguiu o primeiro posto en dúas das catro categorías (1º e 4º grao) e Cidade de Antioquía logrou o segundo posto en segundo grao.

Tamén os músicos dunha decena de provincias de toda España e de Portugal mostraron o seu talento na primeira edición do Concurso de Gaitas&Percusión da Limia, un evento que contou con gran éxito e que tamén terá continuidade. Trátase dunha tipoloxía de concurso que demanda o público e así quedou demostrado co gran interese que espertou en Xinzo de Limia esta fin de semana.

O Certame Celtibérico de Bandas converteu o concello na capital da gaita e milleiros de persoas foron testemuñas do seu éxito. A ocupación rozou o 100% nos hoteis de toda a comarca e a súa celebración durante toda a fin de semana deu tamén empuxe aos locais hostaleiros.

A alcaldesa, Elvira Lama, destaca o bo ambiente que se viviu na vila dende o venres, cando comezaron a chegar os primeiros músicos, e asegura que “foi a ocasión perfecta para demostrar que o concello pode albergar un evento musical desta categoría, xa que Xinzo de Limia tamén é terra de gaiteiros”. Tamén destacou o impulso económico que supuxo para o municipio: “Temos que apoiar aos nosos comerciantes e hostaleiros ao mesmo tempo que colocamos o concello no foco internacional”. Por todo isto, a rexedora anunciou a intención do executivo local de solicitar que Xinzo sexa sede permanente do Certame Celtibérico e a continuidade, en colaboración coa Escola Municipal de Bandas e Percusión, do Concurso de Gaitas&Percusión da Limia.