O evento comezou cun espazo dedicado ao público infantil, que participaron en obradoiros de decoración de cabazas, pintacaras e talleres inspirados na cultura celta. Estas actividades non só permitiron que os máis novos se mergullasen nas raíces da festividade, senón que tamén incentivaron a súa participación nunha festa tradicional galega que pretende achegar unha alternativa cultural ao Halloween comercial.

Un dos momentos máis esperados foi a representación da Santa Compaña, unha procesión de ánimas envolta en misterio e solemnidade que percorreu as rúas principais de Xinzo e que evocou a nosa rica tradición oral. A procesión foi seguida dun acto teatral a cargo dos membros da Civitas Limicorum, que ofreceron unha escenificación inspirada no pasado castrexo. Non faltaron os bailes castrexos e da Santa Compaña, así como a teatralización dunha queimada. A chocolatada e o caldo castrexo, ofrecidos de forma gratuíta, completaron este encontro comunitario compartindo alimentos entre a veciñanza.

O concerto folk puxo o toque musical á noite, congregando a numerosos afeccionados á música tradicional e dándolle continuidade ao ambiente festivo. Finalmente, a celebración culminou cunha sesión de DJ destinada ao público máis mozo, unha proposta que fixo que a xuventude se sumase tamén á festividade do Samhain.