Xinzo de Limia, 03 de febreiro de 2025. Xinzo de Limia contará cun novo atractivo turístico co remate dun espectacular mural dedicado ao Entroido, que se está a pintar na céntrica rúa Dos de Maio, xunto ao MUGAE. A obra, financiada pola Xunta de Galicia e promovida pola Concellería de Cultura, recolle unha icónica imaxe dunha pantalla, baseada nunha fotografía de Noelia Caseiro.

Os artistas encargados de darlle vida a este mural de 458 m² son Néstor Reinaldo e Pablo Loyola, quen están a traballar con técnicas mixtas para garantir a súa durabilidade e impacto visual. A iniciativa, que estará rematada xusto antes do inicio do Entroido, busca converterse nun punto de referencia para veciños e visitantes, convidándoos a fotografarse coa imaxe e a compartir o espírito do noso Entroido.

O proxecto non só inclúe os traballos de pintado, senón tamén materiais de protección, medios de elevación e a realización dun timelapse fotográfico e en vídeo, capturando o proceso de creación desta obra que pasará a formar parte do patrimonio artístico e cultural da vila.

Con este mural, Xinzo reafirma a súa identidade e pon en valor o Entroido como elemento diferencial, dinamizador e atractivo para o turismo, en vésperas dunha das festas máis esperadas do ano.