Xinzo de Limia, a 04 de setembro de 2024.  O 7 e 8 de setembro, Xinzo de Limia converterase no punto de encontro para as familias que buscan mellorar o seu benestar, coa celebración da I Feira da Saúde e do Benestar na Familia: EXPOFAMILIA. Este evento pioneiro terá lugar no Pavillón de Deportes, organizado por Fusión Fitness, La Tribu – Xinzo e o Concello de Xinzo de Limia, e estará aberto de 11:00 a 14:00 e de 15:30 a 21:00.

EXPOFAMILIA non é só un evento, senón unha oportunidade única para as familias de toda Galicia. Durante dous días, máis de 20 profesionais de distintas disciplinas compartirán o seu coñecemento a través de ponencias, charlas e obradoiros. Estes expertos abordarán temas fundamentais para a saúde e benestar familiar, como a lactancia, primeiros auxilios, nutrición, hábitos de estudo, conciliación, e moito máis. Entre os aspectos máis destacados, a feira contará coa participación do recoñecido pediatra Carlos González.

Carlos González, unha das figuras máis influentes na pediatría e crianza respectuosa, ofrecerá dúas ponencias exclusivas sobre “Necesidades afectivas” e “Autoridade e límites”. Coñecido polos seus libros “Bésame mucho” e “Mi niño no me come”, González fusiona os seus sólidos coñecementos médicos cunha empatía que o converte nun referente para pais e nais. As súas charlas están a despertar un gran interese, non só en Xinzo de Limia, senón en toda Galicia, coas entradas case esgotadas. As ponencias terán lugar nunha carpa especialmente habilitada para acoller ao público.

Ademais, EXPOFAMILIA ofrecerá múltiples espazos de entretemento e aprendizaxe para toda a familia. Para os máis pequenos, haberá un espazo sensorial dedicado a nenos de 0 a 6 anos, onde poderán explorar e xogar nun ambiente seguro e estimulante. Lethx Sound dinamizará o espazo musical, mentres que a zona de lecer ofrecerá actividades como xogos de mesa, contacontos, obradoiros de barro, masaxes, capoeira, e defensa persoal, entre outros.

O evento tamén contará cun espazo dedicado á seguridade familiar, onde os nenos poderán interactuar con elementos da Garda Civil, como coches, motos, drons, e un can policía, nunha xornada deseñada para ensinarlles sobre seguridade dun xeito lúdico. Aínda que esta actividade será un punto de interese, o verdadeiro foco do evento reside nas múltiples ponencias e cursos que permitirán ás familias mellorar a súa saúde e benestar a través do coñecemento.

Para participar en EXPOFAMILIA, será necesario adquirir un pase de 3 euros, que dá acceso a todas as actividades e sorteos, excepto ás ponencias de Carlos González, que requiren unha entrada adicional dispoñible en Parrulos, Fusión Fitness ou de forma online. Ademais, haberá máis de 20 sorteos ao longo dos dous días, xunto con 8 expositores que ofrecerán produtos especializados en calzado respectuoso, libros, xogos, mochilas e outros artigos de interese.

Por último, o Concello de Xinzo de Limia quere expresar o seu máis sincero agradecemento a todos os profesionais e entidades que fixeron posible esta primeira edición de EXPOFAMILIA, así como a todas as persoas que, desde distintos puntos de Galicia, enviaron o seu apoio e mostraron o seu interese por este evento.sdewp'0wsaeqop

EXPOFAMILIA aspira a converterse nunha cita anual de referencia en Xinzo de Limia, un espazo para compartir, aprender e divertirse, mellorando a calidade de vida das familias galegas.